ໜ້າຫຼັກ / ການເຄື່ອນໄຫວ / ປະກາດບົ່ງຕົວແຕ່ງຕັ້ງຄະນະພັກຮາກຖານ ພະແນກ ຍທຂ ແຂວງສາລະວັນ
ໂດຍປະຕິບັດຕາມກົດລະບຽບຂອງພັກປະຊາຊົນ ປະຕິວັດລາວ ສະໄໝທີ XI, ໝວດທີ 2, ມາດຕາ 13 ວ່າດ້ວຍການບົ່ງຕົວແຕ່ງຕັ້ງຄະນະພັກແທນຕໍາແໜ່ງວ່າງ ແລະປະຕິບັດຕາມມະຕິຕົກລົງຂອງຄະນະປະຈຳພັກແຂວງ 827/ຄຈພຂ.ສວ ວ່າດ້ວຍການບົ່ງຕົວແຕ່ງຕັ້ງ ສະຫາຍ ສົມຄິດ ວົງສາລີ ຮອງຫົວໜ້າພະແນກ ເປັນຄະນະພັກຮາກຖານພະແນກໂຍທາທິການ ແລະຂົນສົ່ງ ແຂວງສາລະວັນ, ໂດຍການມອບມະຕິຕົກລົງຂອງ ສະຫາຍ ແຫວນເພັດ ລັດດາວົງ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງສາລະວັນ.
ນອກຈາກນັ້ນ, ກໍໄດ້ຜ່ານມະຕິຕົກລົງ ເລກທີ 838/ຄຈພຂ.ສວ ວ່າດ້ວຍການອະນຸມັດປ່ຽນຊື່ໜ່ວຍພັກທີ່ຂຶ້ນກັບຄະນະພັກຮາກຖານພະແນກ ຍທຂ ມີ 2 ໜ່ວຍພັກ ຄື: ໜ່ວຍພັກຈັດຕັ້ງ, ບໍລິການ-ການເງິນ ແລະກວດກາ ປ່ຽນຊື່ເປັນໜ່ວຍພັກບໍລິຫານ, ໜ່ວຍພັກຂົວທາງ ແລະ ແຜນການ ປ່ຽນຊື່ເປັນໜ່ວຍພັກຂົວທາງ ແລະ ທາງນ້ຳ.
ໃນພິທີ, ສະຫາຍ ບົວແພງເພັດ ໂພໄຊ ເລຂາຄະນະພັກຮາກຖານ ຫົວໜ້າພະແນກ ຍທຂ ແຂວງ ກໍໄດ້ຜ່ານບົດສະຫຼຸບການເຄື່ອນໄຫວຂອງຄະນະພັກຮາກຖານ ໄລຍະ 6 ເດືອນຕົ້ນປີ 2024 ໃຫ້ຮູ້ວ່າ: ໄດ້ເອົາໃຈໃສ່ເຜີຍແຜ່, ເຊື່ອມຊຶມບັນດາເນື້ອໃນເອກະສານທີ່ສຳຄັນຂອງພັກ ໃຫ້ກັບສະມາຊິກພັກ, ພະນັກງານ-ລັດຖະກອນ ເພື່ອຈັດຕັ້ງຜັນຂະຫຍາຍແນວທາງນະໂຍບາຍຂອງພັກ ຫັນເປັນແຜນງານ ແລະໂຄງການເປັນສະເພາະໃນຂົງເຂດວຽກງານຂອງຕົນ ເປັນຕົ້ນແມ່ນມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິ IX ຂອງອົງຄະນະພັກແຂວງ, ມະຕິກອງປະຊຸມໃຫຍ່ ຄັ້ງທີ VI ຂອງຄະນະພັກຮາກຖານພະແນກ ຍທຂ, ທັງໄດ້ຊີ້້ນຳໜ່ວຍພັກກະກຽມດໍາເນີນກອງປະຊຸມໃຫຍ່ຂອງຕົນໃຫ້ສຳເລັດຕາມເວລາທີ່ກຳນົດໄວ້ ພ້ອມທັງຊີ້ນຳການຈັດຕັ້ງປະຕິບັດວຽກງານວິຊາສະເພາະໃຫ້ສຳເລັດຕາມຄາດໝາຍ. ນອກຈາກນັ້ນ, ກໍໄດ້ຊຸກຍູ້ບັນດາໜ່ວຍພັກທີ່ຂຶ້ນກັບ ສືບຕໍ່ຕິດຕາມຊຸກຍູ້ກໍ່ສ້າງມະຫາຊົນກ້າວ ເພື່ອຂະຫຍາຍເຂົ້າເປັນສະມາຊິກພັກ, ໃນນັ້ນໄດ້ເປີດຮຽນສະໝັບສະໜູນໃຫ້ມະຫາຊົນກ້າວໜ້າໄດ້ຈຳນວນ 12 ສະຫາຍ, ຍິງ 5 ສະຫາຍ, ຮຽນກົດລະບຽບພັກ 1 ສະຫາຍ, ຮັບເຂົ້າເປັນສະມາຊິກພັກສໍາຮອງ 1 ສະຫາຍ ແລະ ເລື່ອນເຂົ້າເປັນສະມາຊິກພັກສົມບູນ 3 ສະຫາຍ, ຍິງ 2 ສະຫາຍ. ມາຮອດປັດຈຸບັນ, ຄະນະພັກຮາກຖານພະແນກໂຍທາທິການ ແລະຂົນສົ່ງແຂວງສາລະວັນ ມີສະມາຊິກພັກທັງໝົດ 67 ສະຫາຍ, ຍິງ 21 ສະຫາຍ, ໃນນັ້ນສະມາຊິກພັກສົມບູນ 66 ສະຫາຍ, ຍິງ 21 ສະຫາຍ, ສຳຮອງ 1 ສະຫາຍ ກວມເອົາ 79% ຂອງພະນັກງານລັດຖະກອນທັງໝົດ.
ພິທີປະກາດບົ່ງຕົວແຕ່ງຕັ້ງຄະນະພັກຮາກຖານ ພະແນກໂຍທາທິການ ແລະ ຂົນສົ່ງ ແຂວງສາລະວັນ ຈັດຂື້ນໃນວັນທີ 9ສິງຫາ 2024,ທີ່ຫ້ອງປະຊຸມຂອງພະແນກ,ໃຫ້ກຽດເຂົ້າຮ່ວມຂອງ ສະຫາຍ ແຫວນເພັດ ລັດດາວົງ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງ, ມີ ສະຫາຍ ບົວແພງເພັດ ໂພໄຊ ເລຂາຄະນະພັກຮາກຖານ, ຫົວໜ້າພະແນກ ຍທຂ ແຂວງ, ມີບັນດາຄະນະພັກ, ຄະນະພະແນກ, ຜູ້ຕາງໜ້າຈາກຄະນະຈັດຕັ້ງແຂວງ, ຄະນະກວດກາແຂວງ, ຄະນະໂຄສະນາອົບຮົມແຂວງ ແລະພາກສ່ວນຕ່າງໆ ທີ່ກ່ຽວຂ້ອງ ຕະຫຼອດຮອດສະມາຊິກພັກພາຍໃນພະແນກ ເຂົ້າຮ່ວມ.
